Chinese Embassy naglabas ng awiting “Iisang Dagat” para sa COVID-19 frontliners sa China at Pilipinas; umani ng iba’t ibang reaksyon




Larawan mula sa FB video ng Chinese Embassy Manila
  • Alay ng Chinese Embassy Manila sa mga frontliners sa China at Pilipinas ang isang awit
  • Pinamagatan itong “Iisang Dagat” na inawit ng ilang singers kasama ang OPM icon na si Imelda Papin
  • Ngunit tila hindi nagustuhan ng netizens ang awit dahil dumagsa ang mga inis na netizens sa nasabing post ng music video

Idinaan ng Chinese Embassy Manila ang kanilang pasasalamat sa mga frontliners sa bansang China at Pilipinas dahil sa walang patid nilang pagtatrabaho sa kabila ng banta ng C0VID-19 sa mga nasabing bansa.

Naglabas ng awitin at music video ang embahada na pinamagatang “Iisang Dagat” na sinulat daw ng Chinese Ambassador to the Philippines na si Huang Xilian. Ayon sa embahada, ang awitin daw ay para sa mga taong nakapag-ambag upang patuloy na labanan ang pandemic.

Larawan mula sa FB video ng Chinese Embassy Manila

Binigyang-diin din sa post ng Chinese Embassy ang pagdating ng China Medical Expert Team sa Pilipinas na isa sa mga naging inspirasyon upang isulat ang nasabing awitin. Isa sa mga nagtanghal ay ang OPM icon at Vice Governor ng Camarines Sur na si Imelda Papin.

“Ikaw at ako’y nasa iisang dagat ang iyong pagmamahal aking kasama. Ang iyong kamay ay hindi ko bibitawan, maaliwalas na kinabukasan ating masisilayan,” daloy ng liriko ng chorus ng nasabing awitin.

Makikita rin sa nasabing music video ang mensahe ng pasasalamat ni Department of Foreign Affairs (DFA) Secretary Teddy Locsin, Department of Health (DOH) Secretary Francisco Duque III, at ang isang clip mula sa isang address to the nation ni Pangulong Rodrigo Duterte.

Naging laman ng kanilang maikling speech sa video ang mga ipinadalang tulong ng China sa Pilipinas tulad ng mga first class personal protective equipment (PPE) at test kits. Mayroon ding Mandarin lyrics ang kanta na mayroon namang salin sa wikang Filipino.

Larawan mula sa FB video ng Chinese Embassy Manila

Gayunman, mukhang hindi naman nagustuhan ng mga netizens ang nasabing kanta. Mas naiisip daw kasi ng mga netizens ang mensahe ng titulo pa lamang na tila pagsuko na ng Pilipinas sa mga pinag-aagawang teritoryo sa West Philippine Sea (WPS). Habang isinusulat ang balitang ito, umabot na sa 9,200 reactions ang video na karamihan ay ‘angry at haha’ at mayroon na ring 4,300 comments.

Sabi ng mga Pilipinong nagkomento, salamat daw sa mga tulong na ibinibigay ng China ngunit ang sa Pilipinas daw ay sa Pilipinas o sa madaling sabi, dapat nang ibigay ng China sa bansa ang mga isla sa WPS at itigil na ang pag-angkin dito kung talaga raw kaibigan ng Pilipinas ang China.

Panoorin ang awiting handog ng Chinese Embassy para sa mga Pilipino: