Pamali-maling spelling ng “lockdown” at community quarantine, naghatid ng good vibes




Imahe mula sa Facebook account ni Paolo So/Public Domain Image
  • Nagbunsod ng katatawanan sa mga netizens ang ibinahaging conversation threads ng isang Facebook user
  • Nagpapakita kasi ito ng maling spelling o baybay ng “lockdown” at “quarantine”
  • Sa kabuuan ng pag–uusap, hindi naitama o naibigay ang tumpak na spelling ng mga ito

Kaugnay ng pagsawata ng pamahalaan sa paglaganap ng Coronavirus Disease o COVID–19, umusbong ang mga salitang “lockdown” at “quarantine”. Ito ay tumutukoy sa isa sa mga preventive measures upang matiyak na hindi na lalaganap o kakalat pa ang isang pandemic.

Kaya naman, naghatid ng good vibes ang ibinahaging Facebook post ng nagngangalang “Paolo So” na nagpapakita ng conversation threads ng isang magkaibigan (na hindi naman tinukoy kung ang mismong netizen ba ang kasangkot) na may mga maling spelling ng “lockdown” at “quarantine”.

Imahe mula sa Facebook account ni Paolo So/Public Domain Image

Ayon sa larawan, nagkumustahan ang magkaibigan sa isa’t isa. Ayon sa unang thread, sila raw ay naka–”lookdown” na sa Maynila. Nang tinanong siya ng kaibigan, kung ano ang “lookdown”, muli niyang itinuwid ang sarili, subalit mali pa rin, dahil “luckdown” ang sinabi niya.

Nang tanungin ulit siya ng kaibigan kung ano ang “luckdown”, muli itong tinuwid ng lalaki sa pangatlong pagkakataon, na mali pa rin dahil “lackdown” naman ang kaniyang sinambit. Sa huli, sumuko na ang lalaki sa salitang “lockdown” at ginamit naman ang terminong “community warranty”, sa halip na quarantine.

Umabot sa 15, 000 ang reaksyon at 4, 700 shares ang naturang Facebook post na nagbunsod ng katatawanan sa mga netizen. Nagbigay rin sila ng komento hinggil dito.

Sabi ng isa, “Ano ba talaga, Kuya? Lahat puro mali hahaha.”

Turan naman ng isa, “Nakakatawa yung hindi niya alam ang tamang spelling ng lockdown, pero mas nakakatawa yung warranty hahaha.”

“Sa panahon ngayon, kailangan natin ng mga pampa–good vibes na ganito. Iyan tayong mga Pilipino. Nakakahanap pa rin tayo ng kasiyahan sa mga bagay na seryoso at napagdudulot ng krisis sa lahat,” komento naman ng isa.

Public Domain Image

Ang salitang “quarantine” ay nangangahulugang “restriction on the movement of people and goods which is intended to prevent mainly the spread of disease or pests”. Ang lockdown naman ay isinasagawa kapag may “imminent threat to the lives or risk of injury to humans; emergency protocol that usually prevents people or information from leaving an area.”