Lasapin ang sarap at ginhawang dulot ng “Haluhalo”




Mga larawan mula sa Google Image Public Domain

Hindi kompleto ang “summer feels” kung walang mga pagkaing papawi sa alinsangang dulot ng tag–init. Isa na riyan ang malamig, masarap, at hindi matatanggihang “haluhalo”.

Ang haluhalo ay isa sa mga sikat na “dessert” o panghimagas na pagkain ng mga Pilipino sa literal nitong pagpapakahulugang “halo–halo” o “sama–sama”.

Upang masabing haluhalo, hindi dapat mawala ang mga sumusunod na sangkap: ginadgad na yelo, gatas, asukal, sago, gulaman, pinipig at saging. Kung may budget pa, maaaring lagyan ng langka, kamote, kaong, mga hiwa ng iba’t ibang prutas, leche flan, ube, cherry, at scoop ng sorbetes sa ibabaw nito.

Larawan mula sa Google Image Public Domain

Sinasabing unang nagkaroon ng haluhalo sa Pilipinas sa kalagitnaan ng 1920 hanggang 1930 sa Pamilihan ng Quinta sa Quiapo, Maynila na nagmula sa Japanese dessert na “mitsumame”.

May pagkakatulad  ang panghimagas na ito sa iba’t ibang pampalamig sa Asya, tulad ng “kakigori” ng Japan, “patbingsu” ng Korea, at “baobing” ng Taiwan, na pawang gawa sa ginadgad na yelo.

Mula sa mga bahay-bahay, eskinita, hanggang sa pinakasikat na mga restaurant ay tinatangkilik ang haluhalo.

Isa sa mga popular na kainang nagtitinda ng haluhalo ay ang “Chowking,” “Mang Inasal”, at “Razon”. Ang “Pampanga haluhalo” ay kilala sa paggamit ng tatlong pangunahing sahog na macapuno, minatamis na saging, at leche flan ngunit ang tunay na nagpapasarap na sangkap nito ay ang gatas na nakahalo sa ginadgad na yelong kanilang ginagamit.

Larawan mula sa Google Image Public Domain

May ilan namang naglalagay ng “twist” sa paggawa nila ng haluhalo upang maging kakaiba ito.

Maaari itong bigyan ng kakaibang lasa sa pamamagitan ng coco nectar o katas ng niyog, at coco-flavored ice cream. Ang ganitong klaseng haluhalo ay maaaring matikman sa isang kainan sa Quezon City. Ang iba pa ay nilalagyan ito ng strawberry, chocolate, at iba pa.

Iwinasto naman ng “Komisyon sa Wikang Filipino” o KWF ang tamang baybay nito. Sa halip na “halo–halo” na alam ng nakararami,  ito ay “haluhalo” batay sa binagong Ortograpiya ng Wikang Filipino noong 2013.

Sadyang sinasalamin ng iba’t ibang paraan ng paghahanda ng haluhalo ang kultura at pagkamalikhain ng mga Pilipino.

Larawan mula sa Google Image Public Domain