“Baybayin” bubuhayin, gagamitin bilang main text sa mga signages, establisimiyento sa Boracay




Imahe mula sa ABS CBN via Twitter/Public domain

Isang paraan ito ng pagpapalakas ng wikang Filipino.

Gagawin nang requirement ang sinaunang paraan ng pagsulat ng mga Pilipino, ang “Baybayin” sa mga signages ng mga establisyimento sa Boracay.

Ayon sa ulat ng ABS CBN,  muling bubuhayin ng mga lokal na opisyal ng Malay, Aklan ang “Baybayin” bilang ‘main text’ sa mga karatula ng mga opisina, at establisyimento sa isla.

Alinsunod sa Executive Order No. 10 ng Malay LGU na siyang nakasasakop sa isla, mandato na ang paggamit ng “Baybayin” bilang katumbas ng mga salita sa Ingles.

Public domain

“Main text must be written in Baybayin (with English subtitle and other languages, as the case may be),” saad sa kautusan na nilagdaan ni Acting Malay Mayor Abram Sualog.

“Government structures like schools municipal halls, barangay halls, health care centers and other public structures and public spaces shall be the first to comply with this signage guide and be followed by private establishments and structures,” dagdag pa nito.

Matatandaang lusot na sa House of Representatives ang House Bill 1022 magtatakda sa Baybayin bilang pambansang sistema ng panulat.

Layunin ng panukalang batas na ito na pataasin ang kamalayan ng mga Pilipino sa katutubong pagsulat na inihahalintulad sa mga bansang China, Japan, Korea, Thailand at iba pa.

Ayon kay Pangasinan Rep. Leopoldo Bataoil, isa sa mga may-akda ng House Bill 1022, sa oras na maisabatas ay oobligahin nito ang mga gumagawa ng produkto na ilagay ang Baybayin sa mga tatak nito gayundin ang lahat mga establisyimento sa  bansa na ito’y gamitin.

Ang lahat ng mga karatula, tanda, babala at mga palatandaan sa mga kalsada, establisyemento, mga tanggapan tulad ng ospital, himpilan ng pulisya, mga pamatay sunog at gusali ng pamahalaan ay gagamit na ng “Baybayin.”

Ang mga pahayagan ay oobligahin na ilagay ang Baybayin translation sa kanilang mga ilalathala o akda maging sa mga balitang ililimbag dito.

Tanging Pilipinas na lamang sa buong mundo ang walang sistema ng pagsulat kung saan nakabatay pa rin tayo sa Roman alphabet.